RailEnquiry

नांदेड - दहशतवादी अफझल गुरू आणि अजमल कसाबला फासावर लटकावल्याचा बदला घेण्यासाठी दहशतवादी संघटना सक्रिय झाल्या असून 21 जुलै रोजी नांदेड, भुसावळ आणि जळगाव स्थानकांसह राज्यातील इतर सात ठिकाणी घातपात घडवला जाऊ शकतो, असा सुगावा गुप्तचर यंत्रणा आणि दहशतवादविरोधी पथकाला लागला आहे. त्यापाठोपाठ नागपूर येथील लोहमार्ग पोलिस अधीक्षकांना त्यांनी शुक्रवारी रात्री सतर्कतेच्या सूचना दिल्या. या पार्श्वभूमीवर नांदेडसह तिन्ही स्थानकांवर हाय अलर्ट जारी करण्यात आला आहे. बॉम्बशोधक, श्वान पथकाद्वारे ठिकठिकाणी तपासणीसह पोलिस आणि आरपीएफच्या बंदोबस्तात वाढ करण्यात आली आहे. नांदेडात चार प्लॅटफॉर्म असून प्रत्येक प्लॅटफॉर्मवर तीन पोलिस असा पहारा ठेवण्यात आला आहे. दिवसात दोनदा श्वानपथकाकडून तपासणी सुरू आहे. 20 सीसीटीव्ही कॅमेर्‍यांद्वारे हालचालींवर लक्ष आहे. निरीक्षकासह 45 पोलिस या ठिकाणी आहेत. 15 पोलिसांची अतिरिक्त कुमक मागवण्यात आली आहे. रेल्वे प्रोटेक्शन फोर्सच्या (आरपीएफ) 43 जवानांची मदत घेण्यात येत आहे. रेल्वेचे पोलिस निरीक्षक प्रशांत संपते यांनी ही माहिती दिली.

नांदेडची आदर्श स्थानकांत गणना हुजूरसाहिब नांदेड रेल्वेस्थानकाची गणना आदर्श स्थानकांत होते. सर्वाधिक गाड्यांची ये-जा असलेले मराठवाड्यातील हे एकमेव स्थानक आहे. सचखंड हुजूरसाहिब गुरुद्वारामुळे देशभरातून भाविक येथे येतात. अमृतसर, श्रीगंगानगर, कोलकाता, बंगळुरू, पाटणा अशा लांब पल्ल्याच्या गाड्यांची वाहतूक असते.

निनावी पत्र गेल्या आठवड्यात मुंबई एटीएसला एका निनावी पत्राद्वारे रेल्वेस्थानके उडवून देण्याची धमकी देण्यात आली होती. यानंतर मुंबई, पुणे व नागपूर विभागाच्या लोहमार्ग पोलिसांना सतर्कतेचा इशारा दिला होता. विशेष म्हणजे दहशतवाद्यांनी आजवर जुलै महिन्यांतच घातपात घडवले आहेत.

औरंगाबाद सतर्क राज्यातील सात रेल्वे स्थानकांना धोका असल्याचे सांगण्यात आले आहे. यामुळे औरंगाबादसह नागपूर, गोंदिया, वर्धा, बल्लारशा, भुसावळ, जळगाव, मनमाड व नांदेड या महत्त्वाच्या रेल्वेस्थानकांवर यंत्रणा सतर्क आहे. बॉम्बस्फोटासारखा घातपात होण्याचा इशारा या ठिकाणी देण्यात आला आहे.

72 रेल्वेगाड्या नांदेडातून दररोज ये-जा करतात.

 एक्सप्रेस : गंगासागर, सचखंड, संत्रगच्च्ी, बंगळुरू, तपोवन, नंदीग्राम, देवगिरी

04 प्लॅटफॉर्म नांदेड येथील स्थानकावर 10 हजार दररोजची प्रवासी संख्या