Title - 'महालक्ष्मी एक्‍सप्रेस' सुटणार तीन तास उशीरा

कोल्हापूर : कोल्हापूर टर्मिनलवरून मुंबईसाठी सुटणारी "महालक्ष्मी एक्‍सप्रेस' आज (सोमवार) आणि उद्या (मंगळवार) नियोजित वेळेपेक्षा तब्बल तीन तास उशीरा सुटणार आहे. रोज रात्री 8.30 वाजता निघणारी ही "महालक्ष्मी एक्‍सप्रेस' आज आणि उद्या रात्री 11.30 वाजता सुटणार आहे, अशी माहिती टर्मिनसचे अधिकारी एन. चिकण्णा यांनी "सकाळ'ला दिली.

कोल्हापूर-मुंबई या मार्गावर धावणाऱ्या "महालक्ष्मी एक्‍सप्रेस'मधून रोज अंदाजे दोन हजार प्रवासी प्रवास करतात. कोल्हापूर-मुंबई या मार्गावरील प्रवास करणाऱ्यांसाठी सुखकर असल्याने या "महालक्ष्मी एक्‍सप्रेस'चा सर्वाधिक वापर होतो. मात्र, सोलापूर-कोल्हापूर या गाडीसाठी "महालक्ष्मी एक्‍सप्रेस'ची वेळ बदलावी लागली आहे. पुढील दोन दिवसांमध्ये या गाड्यांसंदर्भातील वेळेचे नियोजन केले जाणार आहे. दरम्यानच्या काळासाठी "महालक्ष्मी एक्‍सप्रेस'ची वेळ बदलण्यात आली असल्याचे चिकण्णा यांनी सांगितले. आज व उद्या "महालक्ष्मी एक्‍सप्रेस'ने प्रवास करणाऱ्यांनी बदललेल्या वेळेचा विचार करून टर्मिनलवर उपस्थित राहावे, असे आवाहनही चिकण्णा यांनी केले आहे.