Title - - रेल्वेत प्रवाशांची आर्थिक लूट -

सोलापूर - सोलापूर विभागावरून धावणार्‍या काही मेल एक्स्प्रेस गाड्यांमध्ये काही खाद्यपदार्थ विक्रेते अव्वाच्या सव्वा दराने विकत आहेत. विक्रेते गणवेशधारी असल्याने ते अधिकृत आहेत वा अनधिकृत हेच समजणे कठीण झाले आहे. मात्र, प्रवाशांची लूट सुरू आहे.

काही गाड्यांना पॅन्ट्रीकार (भोजन व्यवस्था) जोडलेल्या असतात. तरीदेखील अनेक विक्रेते या गाडीत चढतात. पॅन्ट्रीकार नसलेल्या गाड्यात प्रवाशांना खाण्याचे पदार्थ घेण्यासाठी वेगवेगळ्या स्थानकावरून चढणार्‍या विक्रेत्यांवरच अवलंबून राहावे लागते. पॅसेंजर ते सुपरफास्ट गाड्यांपर्यंत सर्वच गाड्यांत प्रवाशांना हा अनुभव येतो.

प्रवाशांचा नाईलाज गाडीतील रेल्वेच्या खाद्यपदार्थांची चव अनेकांना आवडत नाही. तसेच त्याचे दरही जास्त असते. पॅन्ट्रीकार नसलेल्या गाड्यात प्रवाशांना तर कुठलाच पर्याय नसतो. गाडीत येणार्‍या विक्रेत्यांकडून त्यांना खाद्यपदार्थ घ्यावेच लागते. याचा गैरफायदा विक्रेते घेतात. जादा दराने खाद्यपदार्थांची विक्री करतात. ते अनधिकृत विक्रेते असल्याने त्यांचे कुठलेच रेकॉर्ड रेल्वे प्रशासनाकडे नसते.

शिफ्ट पद्धतीने काम सोलापूर रेल्वे स्थानकावर जवळपास 300 अनधिकृत विक्रेते आहेत. याचे काम शिफ्ट पद्धतीने चालते. सकाळी, दुपारी आणि रात्री स्थानकावर कोण काम करेल, हे अगोदर ठरलेले असते. तसेच कोण कोणत्या गाडीत चढायचे, कोणत्या फलाटावर विक्री करायचे हे ठरलेले असते. प्रत्येक जण स्थानकावरील फलाट वाटून घेतलेले असतात. दिवसा अनेक विक्रेते हे सोलापूर स्थानकावरील दोन, तीन, चार आणि पाच फलाटावर असतात आणि रात्री फलाट एकवर येऊनदेखील ते विक्री करतात.