Title - कसारा घाटातील गँगमनना वॉकीटॉकी!

गेल्या आठवडय़ात खंडाळा घाटात मंकी हिलजवळ दरड कोसळण्याच्या घटनेतून धडा घेत मध्य रेल्वेने घाटांत काम करणाऱ्या गँगमनना पुढील महिन्यापासून पावसाळ्यापुरता मोबाइल वा वॉकीटॉकी देण्याचा निर्णय घेतला आहे.
यामुळे घाटात दरड कोसळली की, काहीच वेळात त्याची माहिती नजिकच्या स्टेशन मास्तर किंवा गाडीच्या गार्डला थेट गँगमनच देईल. ऑगस्टमध्ये पडणाऱ्या पावसाचे प्रमाण लक्षात घेता ही सुविधा फायद्याची ठरू शकेल, असे मुख्य जनसंपर्क अधिकारी अतुल राणे यांनी सांगितले.
मध्य रेल्वेवर खंडाळा (२८ किलोमीटर) आणि कसारा (१६ किलोमीटर) हे दोन मुख्य घाट आहेत. पावसाळ्यात या घाटांतून गाडय़ा हळू चालविल्या जातात. मात्र दरड कोसळून मोठय़ा अपघाताची शक्यता असते. सध्या दरड कोसळली असल्यास गँगमन तीन वेळा फटाके फोडून सूचित करतो. मात्र ही पद्धत धोकादायक असल्याने वॉकीटॉकीचा निर्णय घेण्यात आला आहे.