Title - डेक्कन ओडिसीवर ४० टक्के सवलत-मुंबई -महाराष्ट्र-Maharashtra Times

डेक्कन ओडिसीवर ४० टक्के सवलत
म. टा. प्रतिनिधी , मुंबई

महाराष्ट्र व गोव्यातील प्रमुख पर्यटन स्थळाची शाही सैर घडविणाऱ्या ' डेक्कन ओडिसी ' च्या तिकिटाचे दर महिनाभरात दुसऱ्यांदा कमी करण्यात आले असून यावेळी दरांमध्ये थेट चाळीस टक्क्यांची सूट जाहीर करण्यात आली आहे. मार्च महिन्यात या पंचतारांकित आलिशान रेल्वेगाडीची महाराष्ट्रभ्रमंती सुरू होणार आहे.

महाराष्ट्र पर्यटन विकास महामंडळाचा उपक्रम असलेल्या ' डेक्कन ओडिसी ' च्या सात रात्री व आठ दिवसांच्या सहलीमध्ये महाराष्ट्रातील सिंधुदुर्ग , औरंगाबाद , नाशिक , कोल्हापूरचा समावेश आहे. लाखांच्या घरात जाणाऱ्या या प्रवासाच्या तिकिट दरांमध्ये जानेवारी महिन्यामध्ये २५ टक्क्यांची सवलत देण्यात आली होती. त्यानंतर आता मार्च महिन्यात निघणाऱ्या सहलीवर ४० टक्क्यांची सवलत देण्यात आली आहे. डिलक्स केबिन , प्रेसिडेन्शियल सूट आणि प्रेसिडेन्शियल सूट विथ एक्स्ट्रा ऑक्युपेन्सी असे तीन प्रकारचे कोचेस उपलब्ध असून सहलीचा शुभारंभ २० मार्चला होणार आहे.

संपर्कः डेक्कन ओडिसी सेल- ( 0 २२) २२८३ ६६९० , ८८७९२२२०७६.