Title - नांदेड-पुणे रेल्वेसेवेची घोषणा

औरंगाबाद

मराठवाडयातील परभणी , बीड , मानवत आणि अन्य काही भागांतील प्रवाशांना पुण्याला जाण्यासाठी विशेष रेल्वेसेवा सुरू करण्याची मागणी दक्षिणमध्य रेल्वेने अखेर मान्य केली आहे. मे महिन्यात या विशेष सेवेच्या चार फेऱ्या सोडल्या जाणार असून , यातील दोन औरंगाबादमार्गे , तर दोन अकोलामार्गे आहेत.
पुण्याला जाण्यासाठी मराठवाड्यातील प्रवाशांना केवळ एकच गाडी आहे. या मार्गावर प्रवाशांची गर्दी खूप असल्याने तिकिटासाठी मोठी प्रतीक्षायादी अपरिहार्य ठरत आहे. त्यामुळे नांदेड-पुणे रेल्वेसेवा सुरू करण्याची मागणी मराठवाडा रेल्वे प्रवासी संघटनेने बऱ्याच काळापासून लावून धरली होती. आतापर्यंत या मागणीला केराची टोपली दाखवणाऱ्या दक्षिणमध्य रेल्वेने अखेर ही मागणी मान्य केली आहे.

नांदेड-पुणे रेल्वेसेवेसाठी मराठवाडा रेल्वे प्रवासी संघटनेने २६ एप्रिलपासून उपोषण सुरू करण्याचा इशारा दिला होता. मात्र , २५ एप्रिल रोजी नांदेडच्या विभागीय व्यवस्थापकांनी दोन दिवसांत रेल्वेगाडीची घोषणा करण्याचे आश्वासन दिल्यानंतर त्यांनी हे आंदोलन मागे घेतले. ०७९३१ क्रमांकाची नांदेड-पुणे ही रेल्वेगाडी अकोला मार्गे आठ मे आणि २२ मे रोजी सकाळी ६.१५ वाजता नांदेडहून निघेल. रात्री ९.०५ मिनिटांनी गाडी पुण्याला पोहोचणे अपेक्षित आहे. त्याच रात्री ही गाडी पुण्याहून नांदेडकडे निघणार आहे.

या रेल्वेगाडीत एकूण ११ डबे आहेत. यातील एक टू टियर एसी , एक थ्री टियर एसी पाच स्लीपर कोच , दोन जनरल डबे आणि दोन लगेज कम ब्रेक व्हॅन कोच आहेत.

गाडीचा मार्ग

नांदेड-पुणे ही ०७९२९ क्रमांकाची गाडी नांदेडहून १५ मे आणि २९ मेला सकाळी सहा वाजून १५ मिनिटांनी निघेल. ही रेल्वेगाडी पूर्णा , परभणी , सेलू , परतूर , जालना , औरंगाबाद , मनमाडमार्गे २१.०५ वाजता (रात्री नऊ वाजून पाच मिनिटांनी) पुण्याला पोहोचणे अपेक्षित आहे. पुणे- नांदेड ही ०७९३० क्रमांकाची गाडी १५ मे आणि २९ मे रोजी रात्री दहा वाजता निघणार असून दुसऱ्या दिवशी दुपारी अडीच वाजता नांदेडला पोहोचणे अपेक्षित आहे.