Title - प.रेल्वेचे गार्ड संपाच्या तयारीत

मुंबई

रिक्त जागांचा अनुशेष, कामाचा अतिरिक्त ताण, साप्ताहिक सुट्ट्यांचा अभाव या भरीस पश्चिम रेल्वे प्रशासनाने चालवलेल्या दंडेलीची भर याने त्रासलेल्या लोकल रेल्वेगार्डांनी संपावर जाण्याची तयारी चालवली आहे. लोकलमधील वरिष्ठांऐवजी कनिष्ठ गार्डांना मेल/एक्स्प्रेस गाड्यांमध्ये प्राधान्य देण्याच्या रेल्वे प्रशासनाच्या भूमिकेविरोधात ' मुंबई गार्डस् असोसिएशन ' ने संपावर जाण्याचा इशारा दिला आहे. हा इशारा प्रत्यक्षात अंमलात आल्यास पश्चिम रेल्वेची उपनगरीय सेवा संपूर्णपणे ठप्प होण्याची भीती निर्माण झाली आहे.

मुंबई सेंट्रलवरून राजधानीसह अनेक महत्त्वाच्या एक्स्प्रेस चालवल्या जातात. या गाड्यांमध्ये गार्ड म्हणून काम करण्याचा मान उपनगरीय मार्गावरील वरिष्ठ गार्डांना दिला जातो. मेल/एक्स्प्रेसमधील कामाचे स्वरूप पाहता अनुभवी गार्डांची त्यासाठी नियुक्ती केली जाते. मात्र, ' परे ' च्या काही अधिकाऱ्यांनी या नियुक्तीत वरिष्ठांऐवजी फार अनुभव गाठीशी नसणाऱ्या गार्डांना प्राधान्य दिल्याचा आरोप असोसिएशनने केला आहे.

या चुकीच्या पद्धतीमुळे प्रवाशांच्या जिवाशी खेळ होत आहे. वरिष्ठ गार्डांना नेमण्याची पद्धत वर्षांनुवर्षे सुरू आहे. मात्र, त्याकडे कानाडोळा करत अधिकारी मनमानी पद्धत अवलंबत असल्याची टीका असोसिएशनने केली आहे. यासह विविध स्तरावर गार्डांच्या तक्रारी असून त्याकडे प्रशासन दुर्लक्ष करत आहे. त्याविषयी, वरिष्ठ अधिकाऱ्यांकडे पत्रव्यवहार करण्यात आला आहे. त्यात या प्रश्नावर मार्ग सामोपचाराने मार्ग न निघाल्यास संपावर जावे लागेल, असे असोसिएनशतर्फे स्पष्ट करण्यात आले आहे.

गार्डांची संख्या अपुरी...

याआधीच प्रशासनाच्या धोरणामुळे गार्डांची संख्या कमी आहे. त्यामुळे कामाचा जादा ताण येत असून साप्ताहिक सुट्ट्याही मिळत नसल्याची तक्रार आहे. ' परे ' च्या उपनगरीय मार्गावर गार्डांची ४६९ पदे आहेत. मात्र, त्यापैकी ७६ पदे रिक्त असल्याने इतरांवर त्याचा ताण पडत आहे. त्यात काहीजण आजारपण आदींमुळे सुट्ट्यांवर आहेत. अशावेळी, सुमारे ९० ते १०० गार्डांना ओव्हरटाइम करणे भाग पडत आहे. त्याचा परिणाम प्रकृतीवर होत आहे. सध्याच्या काळात सुमारे १०० गार्डांना ओव्हरटाइम करावा लागत असल्याचे सांगितले जाते.

अतिरिक्त ड्युटी

केवळ मुंबईच नव्हे तर बलसाड, उदना, सुरत ते नंदूरबार या ' परे ' च्या संपूर्ण हद्दीत गार्डांची अनेक पदे रिक्त आहेत. या संपूर्ण मार्गावर लोकल आणि मेल/एक्स्प्रेससाठी ९३० पदे आहेत. परंतु, त्यातील १५५ पदे रिक्त असल्याने उर्वरित ७७५ गार्ड अतिरिक्त ड्युटी बजावत आहेत.