Title - मध्य रेल्वेवर पेंटोब्लॉक

पॉवरब्लॉकच्या कामादरम्यान इलेक्ट्रिकल विभागाने घातलेल्या गोंधळामुळे शुक्रवारी मध्य रेल्वेची सेवा सकाळी आठ वाजल्यापासूनच विस्कळीत झाली. या गोंधळामुळे ठाणे-कल्याण मार्गावरील तब्बल आठ लोकलमधील २५ पेंटोग्राफमध्ये बिघाड झाला आणि मध्य रेल्वेवर एकच गोंधळ उडाला. सायंकाळी उशिरापर्यंत मध्य रेल्वे विस्कळीत होती.

गुरुवारी रात्री ठाण्याजवळील पारसिक बोगद्यामध्ये एसी-डीसी परावर्तनासाठी विशेष पॉवरब्लॉक घेण्यात आला होता. त्यावेळी, डाऊन मार्गावरील लोकलचा पेंटोग्राफ जोडल्या जाणाऱ्या ओव्हरहेड वायरची ऊंची अपेक्षेपेक्षा जास्त ठेवण्यात आली. हे अंतर ठेवण्यात चूक झाल्याचा फटका शुक्रवारी बसला. काम करताना अंतराचे प्रमाण चुकल्याने घोळ झाल्याचे एका वरिष्ठ रेल्वे अधिकाऱ्याने सांगितले.

मेगाब्लॉक संपून लोकल सुरू झाल्यानंतर हा गोंधळ लक्षात आला.

सकाळी आठच्या सुमारास सीएसटी-अंबरनाथ लोकल कल्याण येथे आल्यावर पेंटोग्राफमध्ये बिघाड झाला आणि लोकल जागीच थांबली. डिझेल इंजिनच्या मदतीने ती खेचून अंबरनाथकडे पाठवण्यात आल्यानंतर या मार्गावरील वाहतूक सुरू झाली. मात्र, तोपर्यंत हजारो प्रवाशांचे अतोनात हाल झाले. पुण्याकडे जाणारी डेक्कन एक्स्प्रेस आणि कोल्हापूरला जाणाऱ्या कोयना एक्स्प्रेसचाही खोळंबा झाला.

त्यानंतर एकूण आठ गाड्यांमधील २५ पेंटोग्राफमध्ये बिघाड झाल्याचे लक्षात आले. या बिघाडामागचे नेमके कारण इंजिनीअर पथकाच्या लक्षात येत नव्हते. दुपारी उशिरा हा प्रकार लक्षात आला आणि नव्याने दुरुस्तीचे काम हाती घेण्यात आले. मात्र, तोपर्यंत आठ गाड्यांची रवानगी कारशेडमध्ये करावी लागल्यामुळे रेल्वेच्या ५० फेऱ्या रद्द कराव्या लागल्या.