Title - मेगाब्लॉकच्या दिवशी ठाणेमार्गे पनवेल

मेगाब्लॉक असेल त्या वेळेत हार्बरच्या नवी मुंबईकरांना सीएसटीहून वाशी वा पनवेलला जाण्यासाठी ठाणेमार्गे ट्रान्सहार्बर लोकलमधून प्रवास करण्याची परवानगी देण्याचा निर्णय मध्य रेल्वेने घेतला असून त्याची अंमलबजावणी दोन आठवड्यांत होऊ शकेल . या सुविधेमुळे नवी मुंबईतील लाखो प्रवाशांना मेगाब्लॉकवेळी रखडावे लागणार नाही .

उपनगरीय मार्गाच्या देखभालीसाठी दर रविवारी मेगाब्लॉक घेतला जातो . मध्य आणि पश्चिम रेल्वेवरील वाहतूक या वेळेत विलंबाने का होईना सुरू असते . पण , हार्बर मार्गावर सीएसटी ते पनवेलपर्यंतचा मार्ग पूर्णपणे बंद ठेवला जातो . परिणामी , नवी मुंबईतील प्रवाशांना बससाठी ताटकळत उभे राहावे लागते . हे हाल लक्षात घेऊन मध्य रेल्वेने हार्बरच्या प्रवाशांसाठी ट्रान्सहार्बर मार्ग वापरण्याचे ठरवले आहे . त्यानुसार , ' मरे ' ने मुख्य मार्गावरून ठाण्यापर्यंत आणि तिथून ट्रान्सहार्बर मार्गाने वाशी - पनवेलपर्यंत लोकल जोडण्याचा पर्यायी मार्ग अवलंबण्याचे ठरवले आहे . ठाणे यार्डच्या रिमॉडेलिंगचे मोठे काम पूर्ण झाल्याने हा पर्यायी मार्ग खुला झाल्याचे वरिष्ठ रेल्वे अधिकाऱ्यांनी सांगितले .

चारपैकी दोन ट्रॅक उपलब्ध

पनवेलला जोडणाऱ्या चार ट्रॅकपैकी प्रत्येकी दोन - दोन ट्रॅक ठाणे ते पनवेल आणि सीएसटी ते कुर्ला - मानखुर्दमार्गे जातात . त्यामुळे मानखुर्द - वाशीवर मेगाब्लॉक असल्यास पनवेल लोकल ठाण्यावरून पुढे नेण्यात येतील . येत्या आठवड्यात वा त्यापुढच्या आठवड्यात मेगाब्लॉक घेतला जाईल , तेव्हा ही पर्यायी पद्धत अवलंबली जाईल . मात्र , त्याच्या फेऱ्या कमी असतील , असेही स्पष्ट करण्यात आले आहे .