Title - रेल्वेची जर्मन तंत्रज्ञानाला साद

मुंबई : चर्चगेट ते डहाणू आणि सीएसटी ते कर्जत/कसारा/खोपोली/पनवेलपर्यंत विस्तार असणाऱ्या उपनगरी मार्गावर ' दर तीन मिनिटांनी लोकल ', असा दावा रेल्वेतर्फे बिनधास्त केला जातो. पण त्या मार्गांवर प्रवास करणाऱ्या प्रवाशांना हा दावा किती खोटा आहे हे रोज अनुभवास येत असते. मात्र , हा दावा प्रत्यक्षात आणण्यासाठी रेल्वेने आता जर्मन तंत्रज्ञानाला साद घातली आहे. एमआरव्हीसीने उपनगरी मार्गाच्या विकासासाठी हाती घेतलेल्या योजनांमधून दर तीन मिनिटांनी लोकल आणि स्वयंचलित वेळापत्रक पद्धत कार्यान्वित केली जाणार आहे. त्यासाठी जर्मनीतील अद्ययावत तंत्रज्ञानाची मदतही घेतली जाणार आहे.

यासाठी रेल्वेने ' रेल ऑपरेशन सिम्युलेशन प्रोग्रॅम ' हाती घेतला आहे. याच्या आधारे कम्प्युटराइज्ड पद्धतीने वेळापत्रक तयार केले जाणार आहे. आतापर्यंत मानवी बुद्धीच्या बळावर रेल्वेचे वेळापत्रक आखण्यात येते. तांत्रिकदृष्ट्या ते अचूकही असते. मात्र , नव्या सॉफ्टवेअरमुळे त्यात अधिक काटेकोरपणा आणता येणार आहे.

कम्प्युटरवर वेळापत्रक

जर्मनीतील ' आरएम कॉम ' ही कंपनी या पद्धतीने वेळापत्रक तयार करते. त्यासह हैदराबादमधील एका कंपनीचेही त्यासाठी साह्य घेतले जाईल. त्यात संपूर्ण वेळापत्रक कम्प्युटरवर तयार केले जाईल. अद्ययावत आणि स्वयंचलित असणाऱ्या या तंत्रज्ञानामुळे तीन मिनिटांत लोकल धावण्याचे स्वप्न साकारणार आहे. या पद्धतीने सर्वच मार्गांवरील गाड्यांचे नियोजन करणे शक्य असल्याचे मत राकेश सक्सेना यांनी व्यक्त केले. जर्मनीमध्ये या कंपनीने याप्रकारचे तंत्रज्ञान प्रत्यक्षात वापरात आणले आहे. त्यासाठी इथल्या वेळापत्रकाचा सारा डाटा तयार करण्याचे काम सुरू असल्याचे सांगण्यात येते. हा डाटा तयार झाला की त्यापुढील प्रक्रिया अमलात आणली जाणार आहे.