Title - विद्यार्थ्यांनी काढला रेल्वेतील 'फॉल्ट'

गपूर

तुळशीरामजी गायकवाड - पाटील कॉलेज ऑफ इंजिनीयरिंग अॅन्ड टेक्नॉलॉजीच्या इलेक्ट्रॉनिक्स विभागाचे अंतिम वर्षाच्या विद्यार्थ्यांनी ' कम्प्युटर बेस्ड लोकोमोटिव्ह फॉल्ट डायग्नोस्टीक अॅन्ड ट्रबल शूटिंग सिस्टिम ' तयार करून रेल्वे ड्रायव्हरच्या प्रशिक्षणात असलेला ' फॉल्ट ' दुरूस्त केला आहे .

रेल्वे ट्रेनिंग अॅकेडमीमध्ये रेल्वेत भरती होणाऱ्या लोको पायलटच्या प्रशिक्षणासाठी आलेल्या प्रशिक्षणार्थींना गाडी चालवताना येणाऱ्या ' फॉल्ट ' बद्दल आतापर्यंत कागदावरच माहिती दिली जात असे . अत्यंत जिकरीच्या अशा ड्रायव्हरच्या प्रशिक्षण कार्यक्रमात प्रॅक्टिकल ट्रेनिंगची नेहमीच कमतरता भासत आली आहे . त्यामुळे त्यांना गाडी चालवताना आलेल्या ' फॉल्ट ' वर तातडीने उपाय शोधण्यात बरीच अडचण जात असे . नेमकी हीच गरज ओळखून गायकवाड - पाटील कॉलेजच्या विद्यार्थ्यांनी प्रणाली विकसित केली आहे . या प्रणालीमुळे रेल्वेच्या इतिहासात ड्रायव्हरला पहिल्यांदा प्रॅक्टिकल ट्रेनिंग देणे शक्य होणार आहे . या प्रणालीचे वैशिष्ट्य म्हणजे , इंजिनमध्ये स्वतः फॉल्ट तयार करेल . रेल्वेगाडी चालवताना आलेले असे फॉल्ट कसे ओळखावे आणि योग्य निर्णय घेऊन त्याला त्वरित कसे दुरूस्त करायचे याचे प्रात्यक्षिक दाखवेल . शिवाय , परीक्षा देताना त्यांचा परफॉर्मन्ससुद्धा याद्वारे रेकॉर्ड करता येईल .

हा प्रकल्प मध्य रेल्वे नागपूर विभागाचे इन्स्ट्रक्टर एस . जी . राऊत यांच्या मार्गदर्शनात पूर्ण झाला . मध्य रेल्वेने गायकवाड - पाटील कॉलेजसोबत त्यासंदर्भात करारही केला आहे . इलेक्ट्रॉनिक्स विभागाचे विद्यार्थी प्रवीण कुळकर्णी , सुहास राऊत , हर्षल हुमने , सुदांशू शातलवार , पुनित दोहारे आणि आतिश महल्ले यांनी ही प्रणाली विकसित केली . कॉलेजचे प्राचार्य डॉ . जी . के . आवारी , गायकवाड - पाटील समूहाचे सचिव प्रा . मोहन गायकवाड , अध्यक्ष प्रा . शरद पाटील , विभाग प्रमुख श्रुती पौनीकर यांनी विद्यार्थ्यांचे अभिनंदन केले