Title - शरद पवार करणार 'लोकल' प्रवास

ठाणे

राष्ट्रवादी काँग्रेसचे आमदार जितेंद्र आव्हाड यांनी कळवा मुंब्रा परिसरात केलेल्या विकासकामांचे उद्घाटन आणि भविष्यात येऊ घातलेल्या महत्त्वाकांक्षी प्रकल्पांचे भूमिपूजन करण्यासाठी राष्ट्रवादी काँग्रेसचे अध्यक्ष आणि केंद्रीय कृषीमंत्री शरद पवार येत्या रविवारी , १९ मे रोजी ठाण्यात येत आहेत . विशेष म्हणजे यावेळी ते मुंब्रा ते कळवा हा प्रवास लोकलने करणार आहेत .

मार्गी लागलेल्या विकासकामांची माहिती आव्हाड यांनी सोमवारी पत्रकार परिषदेत दिली . काश्मिर येथील अनंतनाग जिल्ह्यात अतिरेक्यांशी लढताना ठाण्यातील मेजर मनीष पितांबरे यांना वीरमरण आले होते . त्यांच्या स्मृतीप्रित्यर्थ मिळालेला रणगाडा मुंब्रा स्टेशनसमोरील दर्शनी भागात ठेवण्यात आला आहे . तसेच , सुमारे १८ टन लोखंड वापरून तयार केलेली एम आकाराची भव्य कमानही मुंब्रा स्टेशनबाहेर उभारण्यात आली आहे . मुंब्य्राच्या अल्मास कॉलनी येथे उर्दू लायब्ररी उभारण्यात आली आहे . त्याशिवाय मुंब्य्राचे रस्ते अडवून बसणाऱ्या सुमारे ५०० फेरीवाल्यांसाठी कौसा येथे दोन एकर जागेवर ओपन हॉकर्स प्लाझा उभारण्यात आलाय . अशा स्वरुपाचा हा राज्यातला पहिला हॉकर प्लाझा असून , तिथे भविष्यात नाईट मार्केटही सुरू करण्याचा मानस त्यांनी व्यक्त केला .

कळवा स्टेशन सुधारणा योजनांमध्ये पार्किंग प्लाझा आणि ज्येष्ठ शाहीर दामोदर पाटील यांच्या नावे रेल्वे स्टेशनात वेटिंग रुम बांधण्यात आली आहे . त्या सर्व कामांचे उद्घाटन शरद पवार यांच्या हस्ते होणार असल्याचे आव्हाड यांनी सांगितले . मुंब्रा बायपासवर तयार केलेल्या क्रीक व्ह्यू पॉईंटवरून विस्तीर्ण मुंब्रा खाडीचे विहंगम दृष्य दिसते तो पाईंटही रविवारपासून खुला केला जाणार असल्याचे त्यांनी सांगितले .

डॉ . बाबासाहेब आंबेडकर सामाजिक न्याय भवन बांधण्यासाठी राज्य सरकारने कळव्याची निवड केली असून , साडेतेरा कोटी रुपये खर्च करून बांधल्या जाणाऱ्या या वास्तूचे भूमीपूजनही पवार यांच्या हस्ते होईल . मुंब्रा फायर ब्रिगेडजवळ डॉ . बाबासाहेब आंबेडकर वाचनालय आणि अभ्यासिका , फक्रुद्दीन बाबा दर्गा परिसराचे नूतनीकरण , खारेगाव येथील समाजमंदिर , ज्येष्ठ नागरिक भवन आणि कळवा प्रभाग समिती कार्यालयाचे भूमीपूजनही पवारांच्या हस्ते होणार आहे . खारेगाव येथे वास्तव्याला असलेल्या स्वातंत्र्य सेनानी कावेरीताई पाटील यांचीही पवार सदिच्छा भेट घेणार आहेत .