Title - ജനശതാബ്ദിക്ക് വെള്ളിയാഴ്ച മുതല്‍ വടകരയിലും തലശ്ശേരിയിലും സ്റ്റോപ്പ്‌

കോഴിക്കോട്- തിരുവനന്തപുരം ജനശതാബ്ദി എക്‌സ്​പ്രസ് (കോട്ടയം വഴി) ആഗസ്ത് രണ്ട് മുതല്‍ കണ്ണൂരിലേക്ക് നീട്ടി. കോഴിക്കോടിനും കണ്ണൂരിനും ഇടയില്‍ വടകരയിലും തലശ്ശേരിയിലും സ്റ്റോപ്പുണ്ടാകും.
ട്രെയിന്‍ നമ്പര്‍ 12081 കണ്ണൂര്‍ - തിരുവനന്തപുരം ജനശതാബ്ദി (ബുധന്‍, ഞായര്‍ ഒഴികെ) വെളുപ്പിന് 4.45-ന് കണ്ണൂരില്‍ നിന്ന് പുറപ്പെട്ട് ഉച്ചയ്ക്ക് 13.45-ന് തിരുവനന്തപുരത്തെത്തും. വിവിധ സ്റ്റേഷനുകളിലെത്തുന്ന സമയം: തലശ്ശേരി - 5.04, വടകര-5.23, കോഴിക്കോട്-6.15, തിരൂര്‍-6.50. ഷൊര്‍ണൂര്‍-7.55, തൃശ്ശൂര്‍-8.30, എറണാകുളം ടൗണ്‍-9.48, കോട്ടയം-10.50, ചെങ്ങന്നൂര്‍-11.25, കൊല്ലം-12.33.
12082 തിരുവനന്തപുരം-കണ്ണൂര്‍ ജനശതാബ്ദി (ചൊവ്വ, ശനി ഒഴികെ ) ഉച്ചയ്ക്ക് 2.20ന് തിരുവനന്തപുരത്ത് നിന്ന് പുറപ്പെട്ട് രാത്രി 11.30 ന് കണ്ണൂരിലെത്തും. കൊല്ലം-15.15, ചെങ്ങന്നൂര്‍-16.12, കോട്ടയം-16.52, എറണാകുളം ടൗണ്‍-18.05, തൃശ്ശൂര്‍-19.18, ഷൊര്‍ണൂര്‍-20.20, തിരൂര്‍-21.00, കോഴിക്കോട്-21.55, വടകര-22.30, തലശ്ശേരി-22.50.
മൂന്ന് എ.സി. ചെയര്‍കാര്‍, 13 സെക്കന്‍ഡ് ക്ലാസ് ചെയര്‍കാര്‍, രണ്ട് ലഗേജ് വാന്‍ എന്നിവയുള്ള ജനശതാബ്ദിയിലേക്കുള്ള റിസര്‍വേഷന്‍ ആരംഭിച്ചു. ആഗസ്റ്റ് രണ്ടിന് വൈകുന്നേരം 4.45ന് കണ്ണൂര്‍ റെയില്‍വേ സ്റ്റേഷനില്‍ നടക്കുന്ന ചടങ്ങില്‍ കെ. സുധാകരന്‍ എം.പി. തീവണ്ടി ഫ്‌ളാഗോഫ് ചെയ്യും. രണ്ട് വര്‍ഷം മുമ്പ് സര്‍വീസ് ആരംഭിച്ച ട്രെയിന്‍ കഴിഞ്ഞ റെയില്‍വേ ബജറ്റിലാണ് കണ്ണൂരിലേക്ക് നീട്ടി പ്രഖ്യാപനമുണ്ടായത്. നിലവില്‍ ആഴ്ചയില്‍ അഞ്ച് ദിവസമുള്ള സര്‍വീസ് പ്രതിദിന സര്‍വീസ് ആക്കുന്നത് സംബന്ധിച്ച് നടപടികളൊന്നുമായിട്ടില്ല.