RailEnquiry

जयंत पाटील यांचे प्रतिपादन
म. टा. प्रतिनिधी वैजापूर
यंदा कमी पाऊस झाल्याने मराठवाडा , विदर्भ व पश्चिम महाराष्ट्रातील काही जिल्ह्यासह राज्यात बहुतेक ठिकाणी पिण्याच्या पाण्याची परिस्थिती कठीण आहे. येत्या जुलैपर्यंत नागरिकांना पाणीपुरवठा कसा करावा याचे मोठे आव्हान शासनासमोर आहे. या परिस्थितीवर मात करण्यासाठी राज्यातील विविध भागांना रेल्वे वॅगनद्वारे पाणी देण्याचा शासन विचार करीत आहे असे प्रतिपादन ग्रामविकासमंत्री जयंत पाटील यांनी शुक्रवारी वैजापूर तालुक्यात शिवराई येथे आयोजित शेतकरी मेळाव्यात केले.

शिवराई येथे कृषी विभागाच्या वतीने आयोजित राष्ट्रीय बायोगॅस व खत व्यवस्थापन कार्यशाळा व बायोगॅस प्रकल्पाचे उद्घाटन केले. उद्घाटनानंतर जयंत पाटील यांनी शेतकरी मेळाव्यास मार्गदर्शन केले. ते म्हणाले , ' १९७२ च्या दुष्काळामध्ये मजुरीच्या बदल्यात अन्नधान्य देण्यासाठी रोजगार हमी योजना सुरु करण्यात आली होती. आज देशात अन्नधान्याचा सुकाळ आहे. पण , पाऊस कमी झाल्याने दुष्काळी परिस्थिती निर्माण झाली असून पिण्याच्या पाण्याची समस्या आहे. वाढत्या शहरीकरणामुळे पाण्याची गरजही वाढत आहे. त्यामुळे पाण्याचे काटेकोरपणे नियोजन केले पाहिजे. शेतकऱ्यांनी ठिबक सिंचन पध्दतीचा जास्तीत जास्त वापर केला पाहिजे. ठिबक सिंचन संच पुरवण्यासाठी शासनाने ग्लोबल टेंडर काढले आहे. बदललेल्या परिस्थितीनुसार शेतकऱ्यांनी आधुनिक तंत्रज्ञानाचा वापर करत शेती करावी. ही शेती किफायतशीर करण्यासाठी सर्व संकटावर मात केली पाहिजे.

येत्या विधानसभा निवडणुकीत राष्ट्रवादी पक्षाला मजबूत करण्यासाठी तालुक्यातील प्रत्येक गावात युवा कार्यकर्त्यांचे नेटवर्क उभे करण्याचा सल्ला देत या निवडणुकीत भाऊसाहेब पाटील चिकटगावकर हे वैजापूर विधानसभा मतदारसंघात राष्ट्रवादीचे उमेदवार असतील असे संकेत पाटील त्यांनी दिले.

राष्ट्रवादी काँग्रेसचे जिल्हाध्यक्ष सुधाकर सोनवणे , जिल्हा कार्याध्यक्ष भाऊसाहेब चिकटगावकर , खुशालसिंह राजपूत यांची यावेळी भाषणे झाली. या कार्यक्रमाला जिल्हा परिषदेच्या उपाध्यक्षा विजया पाटील चिकटगावकर , पंचायत समितीच्या सभापती चंद्रकला शेळके , उपसभापती द्वारका पवार , पंचायत समिती सदस्य लहानुबाई डिके , उपविभागिय अधिकारी मुकेश भोगे , तहसिलदार महादेव किरवले आदिंची उपस्थिती होती.
पुढीलवर्षी राज्य लोडशेडींग फ्री
पुढील वर्षात अमरावती व वर्धा येथील वीज प्रकल्पाच्या माध्यमातून एक ते दोन हजार मेगावॅट विजेची उपलब्धता होणार असल्याने संपूर्ण राज्य लोडशेडींग फ्री होणार आहे असे पाटील यांनी सांगितले.