Title - fire Burns mandovi express engine | Loksatta

मुंबईहून मडगांवकडे सोमवारी दुपारी जात असलेल्या मांडवी एक्स्प्रेसच्या इंजिनाला आग लागल्यामुळे कोकण रेल्वे प्रशासनाची मोठी धावपळ उडाली. पण चिपळूण रेल्वे स्थानकावर गाडी आणून आग विझवल्यामुळे मोठा अनर्थ टळला.
ही रेल्वेगाडी चिपळूणपासून सुमारे १५ कि.मी. अंतरावर अंजनी येथे असतानाच इंजिनाच्या कॉम्प्रेसरमधून धूर येऊ लागला. त्यामुळे चालकाने सावध होऊन गाडीचा वेग कमी केला. तसेच चिपळूण स्थानकावर धोक्याचा इशारा दिला. तेथे प्रवाशांना उतरवून इंजिनला लागलेली आग विझवण्यात आली.
त्यानंतर दुपारी सव्वातीनच्या सुमारास इंजिन बदलून गाडी मडगांवकडे रवाना झाली.