RailEnquiry

मध्य रेल्वेवरील प्रवाशांची संख्या ४० लाखांपर्यंत पोहोचली असतानाच या रेल्वेच्या तिजोरीतही मोठ्या प्रमाणावर भर पडत आहे . मध्य रेल्वेच्या मुंबई विभागातंर्गत मेल / एक्स्प्रेस , मालवाहतूक आणि पार्सल सेवेत गेल्या वर्षापेक्षा ४ टक्के आणि महसुलात सुमारे १० टक्क्यांनी वाढ झाली असून गेल्या वर्षाच्या तुलनेत यंदा म . रेल्वेकडे ३६० कोटी रुपयांपेक्षा जास्त महसूल जमा झाला आहे .

मध्य रेल्वेवर उपनगरीय लोकल सेवेप्रमाणेच लांब पल्ल्याची प्रवासी आणि मालवाहतूक मोठ्या प्रमाणावर होत असते . मध्य रेल्वेच्या मुंबई विभागातंर्गत २०१२ - १३ या आर्थिक वर्षात प्रवाशांशी निगडित उलाढाल ३ हजार ८६६ कोटी रुपये एवढी पोहोचली आहे . २०११ - १२ या आर्थिक वर्षात ती ३ हजार ५०५ कोटी रुपये इतकी होती .

यावर्षी मुख्यतः तिकीट दरांबरोबरच मालवाहतुकीच्या दरांतही वाढ झाली आहे , असे रेल्वे अधिकाऱ्यांचे म्हणणे आहे . मध्य रेल्वेवरील मालवाहतुकीचा महसूल गेल्यावर्षी १ हजार ३६० कोटी रुपये होता . २०१२ - १३ मध्ये ही उलाढाल १५४८ कोटी रुपयांवर पोहोचली आहे .
तिकीट , स्टॉल्स , जाहिरात आदी विभागांशी संबंधित असणाऱ्या कमर्शिअल विभागानेही यंदाच्या वर्षी जादा महसूल गोळा केला असून तो सुमारे २९ कोटींवरून ३० कोटींवर पोहोचला आहे .