RailEnquiry

डोंबिवली - डोंबिवली रेल्वेस्थानकात सरकत्या जिन्याच्या कामाचा भूमिपूजन सोहळा मंगळवारी (ता. 16) झाला असला, तरी आता त्यानिमित्त वादाला तोंड फुटू लागले आहे. भूमिपूजनाच्या कार्यक्रमाचे निमंत्रण मला न देऊन रेल्वे प्रशासनाने हेतुपुरस्सर मला डावलले, असा आरोप आमदार रवींद्र चव्हाण यांनी केला. विभागीय रेल्वे व्यवस्थापकांना त्यांनी निषेधाचे एक पत्र दिले आहे. प्रशासनाने स्थानकातील अन्य गैरसोयींकडे दुर्लक्ष केल्यास 15 ऑगस्ट रोजी "रेल रोको' करू, असा इशाराही त्यांनी दिला आहे.

डोंबिवलीत सरकता जिना व्हावा, याकरिता चव्हाण यांनी रेल्वेकडे पत्र आणि नागरिकांच्या सह्यांचे निवेदन दिले होते. अन्य मागण्यांचाही त्यांनी पाठपुरावा केला होता. डोंबिवली स्थानकात सरकता जिना बसविण्याच्या कामाचे भूमिपूजन खासदार आनंद परांजपे यांच्या हस्ते झाले. रेल्वे प्रशासनाने या कार्यक्रमाचे रीतसर निवेदन वा माहिती स्थानिक आमदार म्हणून मला कळविली नाही. ती का कळविली नाही, असा सवालही आमदारांनी पत्रकार परिषदेत केला. फलाटाची उंची वाढविणे, नवीन स्वच्छतागृहे बांधणे, 15 डब्यांच्या गाड्यांच्या थांब्याचे व्यवस्थित फलक लावणे आदी मागण्या मी आधीपासून केल्या आहेत. रेल्वे अधिकारी महाराष्ट्रद्वेष्टे असून सदस्यांच्या मागण्यांना ते केराची टोपली दाखवितात. आमच्या मागण्या प्रलंबित असून त्याची कार्यवाही न झाल्यास 15 ऑगस्ट रोजी "रेल रोको' करू, असा इशाराही चव्हाण यांनी दिला.

कल्याण-डोंबिवली पालिका आयुक्त शंकर भिसे यांची भेट घेऊन शहरातील समस्यांविषयी त्यांना निवेदन दिले आहे. त्यात सार्वजनिक स्वच्छतागृहांची दुरुस्ती, क्रीडा संकुलात वसतिगृह, टिळकनगर पोलिस ठाणे बांधून देणे, उद्यानांची दुरुस्ती आदी मागण्या करण्यात आल्या आहेत, असेही चव्हाण म्हणाले.