RailEnquiry

ठाणे - सामान्य प्रवाशांच्या दररोजच्या जगण्याचा भाग असलेला लोकलचा रेटारेटीचा प्रवास आज केंद्रीय कृषिमंत्री शरद पवार यांनीही अनुभवला. फरक एवढाच होता, की सामान्य नागरिक अन्य प्रवाशांच्याच रेटारेटीने हैराण होतात, तर पवार मात्र माध्यम प्रतिनिधींच्या ढकलाढकलीमुळे त्रस्त झाले.

राष्ट्रवादी कॉंग्रेसचे अध्यक्ष शरद पवार यांच्या आजच्या लोकल प्रवासाविषयी उत्सुकता होती. नेते आणि कार्यकर्त्यांच्या प्रचंड गर्दीत आणि पोलिस संरक्षणात पवार यांनी मुंब्रा ते कळवा असा लोकलप्रवास केला. कळवा रेल्वे स्थानक आणि पादचारी पुलावर तर गर्दी आवरणे पोलिसांना कठीण होऊन बसले. अखेरीस पवार यांनी कळव्यातील अन्य कार्यक्रमांना उपस्थिती लावून दौरा आटोपता घेतला. गर्दी आणि रेटारेटीमुळे त्यांना मुंब्य्रापासून कळवा स्थानकाच्या सुशोभीकरण स्थळाजवळ पोचण्यास तब्बल 24 मिनिटे लागली.

नेते, कार्यकर्ते, पदाधिकारी आणि माध्यम प्रतिनिधी अशा "ओव्हर क्राउडेड' डब्यातून पवार यांनी मुंब्रा ते कळवा हा सहा मिनिटांचा प्रवास केला. कळवा स्थानकात ते उतरले आणि फलाट क्रमांक 2 वरून एकवर येताना रेल्वेच्या पादचारी पुलावर कार्यकर्ते आणि प्रवाशांची प्रचंड गर्दी उसळली. त्या वेळी पवार, खासदार आनंद परांजपे, खासदार संजीव नाईक, पालकमंत्री गणेश नाईक, विधान परिषदेचे उपसभापती वसंत डावखरे अक्षरश: घामाघूम झाले. घाम पुसतच या नेत्यांनी कळव्यातील सुशोभीकरण झालेल्या परिसराची पाहणी केली.

7.45ची "स्लो'
मुंब्रा रेल्वे स्थानक परिसराच्या सुशोभीकरणाचा कार्यक्रम झाल्यानंतर पवार यांनी मुंब्रा ते कळवादरम्यान 7 वाजून 45 मिनिटांच्या "सीएसटी स्लो' लोकलने प्रवास केला. आमदार जितेंद्र आव्हाड यांनी पवार यांच्यासाठी छत्रपती शिवाजी टर्मिनसकडील प्रथम वर्गाचा डबा ठरवला होता; मात्र गर्दीमुळे त्यांना कल्याणच्या दिशेकडील पहिल्या वर्गाच्या डब्यात चढावे लागले. त्यांच्यासमवेत डावखरे, गणेश नाईक, खासदार परांजपे, खासदार डॉ. नाईक आदी होते.