RailEnquiry

मुंबई - केंद्राचा हिरवा कंदील मिळाल्याने कुलाबा-वांद्रे-सांताक्रूझ या संपूर्ण भुयारी असणाऱ्या मेट्रो- 3 प्रकल्पाच्या अंमलबजावणीसाठी मुंबई महानगर प्रदेश विकास प्राधिकरणाने (एमएमआरडीए) हालचाली सुरू केल्या आहेत. एमएमआरडीएचे आयुक्त यूपीएस मदान यांच्यासह अन्य अधिकाऱ्यांनी आज कफ परेड ते आरे कॉलनीपर्यंतच्या मार्गाची एका मिनी बसमधून पाहणी केली. त्या वेळी मेट्रोच्या प्रस्तावित मार्गात येणाऱ्या गिरगाव परिसरात अरुंद रस्ते असल्याने याच परिसरातील कामात मोठे आव्हान असल्याचे त्यांच्या लक्षात आले.

दक्षिण मुंबईला वांद्रे-कुर्ला संकुल, मुंबई आंतरराष्ट्रीय विमानतळ आणि सीप्झ अशा तीन महत्त्वाच्या केंद्रांना जोडणाऱ्या या मेट्रोचा मार्ग सुमारे 34 कि.मि. लांबीचा असणार आहे. ती पूर्णपणे भुयारी राहणार असून, त्यासाठी जमिनीखाली दोन बोगदे खणले जाणार आहेत. त्यामुळे भूसंपादनाचा फारसा प्रश्‍न नसल्याचे एमएमआरडीएचे म्हणणे आहे. "आज आम्ही कफ परेड ते आरे कॉलनीपर्यंतच्या मार्गाची पाहणी केली. त्यात गिरगाव परिसरच आम्हाला सर्वात आव्हानात्मक वाटला. कारण या परिसरातील रस्ते फार अरुंद असून, रस्त्यालगत निवासी इमारतीही आहेत', असे मदान यांनी पत्रकारांना सांगितले. या पाहणीच्या वेळी मेट्रोचा मार्ग कुठून आणि कसा असावा, कुठे कसे काम करावे लागेल, याचा अधिकाऱ्यांनी आढावा घेतल्याचे सूत्रांनी सांगितले.

या प्रकल्पाच्या उभारणीसाठी जपानमधील "जायका' अर्थात "जपान इंटरनशनल कोऑरेशन एजन्सी' या संस्थेकडून एकूण 24 हजार 500 कोटी रुपये खर्चाचा 56 टक्के निधी कर्जरुपाने मिळणार आहे. त्यादृष्टीने केंद्र सरकारच्या अखत्यारितील आर्थिक कामकाज विभागाचा लवकरच जायकाशी सामंजस्य करार होणार असून, त्यानंतर हा निधी प्रकल्पासाठी स्थापन झालेल्या मुंबई मेट्रो रेल कॉर्पोरेशनकडे येईल. प्रकल्प व्यवस्थापन सल्लागार कंपनीच्या नेमणुकीसाठी इच्छुक कंपन्यांचे प्रस्ताव एमएमआरडीएने यापूर्वीच मागविले आहेत.

सात निविदा आणि 23 कंत्राटदार
या मेट्रोच्या मार्गाची उभारणी सात टप्प्यांत करण्याचे एमएमआरडीएने ठरविले आहे. जेणेकरून संपूर्ण प्रकल्पाचे काम सुलभरीत्या सुरू राहील आणि ते 2019 पर्यंत पूर्ण होईल. त्यादृष्टीने सात निविदा काढल्या जाणार असून, त्याअंतर्गत वेगवेगळ्या कामांची 23 कंत्राटे दिली जाणार आहेत. त्यात बोगदे उभारणे, मेट्रोचे रूळ टाकणे, भुयारी रेल्वेस्थानके उभारणे, मेट्रो गाड्या बनविणे आदी कामांचा समावेश आहे, असे अधिकाऱ्यांनी सांगितले.