RailEnquiry

नागपूर

मुख्य रेल्वे स्थानकानजीक असलेल्या डीआरएम परिसरातील काही कनिष्ठ रेल्वे अधिकाऱ्यांची कार्यालये अजनी परिसरात स्थलांतरीत केली तर ते प्रशासनाच्या दृष्टीने योग्य होईल आणि डीआरएम कार्यालयाजवळ होणारी वाहतुकीची कोंडीही बऱ्याच प्रमाणात कमी होईल . त्यामुळे ही कार्यालये अजनीला हलविण्याची मागणी आता पुढे येत आहे .

अजनी रेल्वे कॉलनी ही देशात सर्वात मोठी रेल्वे वसाहत समजली जाते . ही कॉलनी जवळपास शंभर वर्षे जुनी आहे . त्यामुळे येथील अंदाजे पाचशे क्वॉर्टर्स जीर्ण झाल्यामुळे पाडण्यात आले आहेत . आणखीही घरे पाडण्यात येणार आहेत . या इतक्या मोठ्या जागेवर रेल्वेच्या कनिष्ठ अधिकाऱ्यांची कार्यालये , त्यांची निवासस्थाने यांची व्यवस्था करता येऊ शकते . डीईएन , डीसीएम , डीपीओ , डीएसटी , डीएमई , डीई टीआरडी , डीई टीआरओ , डीई इलेक्ट्रिक ही कार्यालये अजनीला हलविता येऊ शकतात . अजनीत इलेक्ट्रिक लोको शेड आहे . कोचिंग कॉम्पलेक्स आहे . आरपीएफचे ठाणे आहे . याशिवाय रेल्वेची अन्य कार्यालयेही आहेत . येथे काम करणाऱ्या हजारो कर्मचाऱ्यांना रोज विविध कामांसाठी ८ कि . मी . दूर असलेल्या डीआरएम कार्यालयात जावे लागते . रेल्वेच्या कार्यालयांचे विकेंद्रीकरकण झाले तर या कर्मचाऱ्यांचे पेट्रोलही वाचेल आणि वेळही . इलेक्ट्रिक लोकोशेडचा विस्तार केला तर अजनी टर्मिनस व अजनी पुलाच्या कामाला वेग येऊ शकेल . अजनी रेल्वे कॉलनीत २२ लाख लिटर क्षमतेची पाण्याची टाकी , रेल्वे हॉस्पिटल , वाचनालय , पोस्ट ऑफिस , स्टेडियम , खेळाची मैदाने अशा साऱ्या सुविधा आहेत . जुन्या कॉलनीतील घरे जीर्ण झाल्यामुळे रिकाम्या होत असलेल्या जागेवर एका बाजूला कार्यालये व दुसरीकडे अधिकाऱ्यांची निवासस्थाने बांधल्यास सिव्हिल लाइन्ससारखाच अजनी परिसरही विकसित होईल , याकडे नगरसेवक तनवीर अहमद यांनी लक्ष वेधले आहे .

अजनी - नागपूर लोकल

अजनी - नागपूर लोकल गेल्या अनेक वर्षांपासून बंद आहे . ती पुन्हा सुरू करण्याची गरज आहे . लोकलची रेल्वेलाइन आजही अजनी परिसरात आहे . वीस वर्षांपूर्वी तेथे गाडी थांबायती . आता ते चित्र दिसत नाही . ज्युनियर अधिकाऱ्यांची कार्यालये अजनीत सुरू झाल्यास वर्धा - पुलगाव , बैतुल - जु्न्नारदेव , चंद्रपूर - बल्लारशाह येथे काम करणाऱ्या रेल्वे कर्मचाऱ्यांना कार्यालयीन कामासाठी नागपूरला आल्यास या लोकलचा उपयोग होऊ शकतो . एसआरपी , सीआरपीएफ , वायुसेना , ऑर्डनन्स फॅक्टरी येथे काम करणाऱ्या मुलांना शाळेत जाण्यासाठी सध्या बसची सुविधा आहे . या विद्यार्थ्यांनाही या लोकलचा उपयोग होऊ शकतो , असेही अहमद यांनी म्हटले आहे .