RailEnquiry

बीड

मराठवाड्यात यावर्षी दुष्काळी परिस्थिती आहे. त्या दुष्काळी परिस्थितीत पिण्याच्या पाण्याची मोठी टंचाई मराठवाड्यातील जनतेला जाणवते आहे. राज्य सरकारने टँकरद्वारे पिण्याचे पाणी पुरवत आहे. मात्र जिथे पाण्याची उपलब्धता नाही अशा ठिकाणी रेल्वेने पाणीपुरवठा करण्यासाठी हावरे इंजिनिअरर्स अॅण्ड बिल्डर्सचे मालक उद्योगपती सुरेश हावरे हे पुढे आलेले आहेत. त्यांनी मराठवाड्यातील बीडसह इतर जिल्ह्यात पिण्याचे पाणी नागरीकांना रेल्वेद्वारे पुरवण्यासाठी लागणारा खर्चही उचलण्याची तयारी दाखवली आहे.

बीडसह राज्यातील अनेक जिल्ह्यात यावर्षी दुष्काळाचे सावट आहे. यावर्षी बीड जिल्ह्यात सरासरीच्या पन्नास टक्केच्या जवळपास पाऊस पडल्याने सप्टेंबर , ऑक्टोबरपासूनच पिण्याच्या पाण्याची टंचाई जाणवू लागली. एप्रिल अखेर बीड जिल्ह्यात साडेचारशेच्या जवळपास टँकर प्रशासनाने पाणीटंचाई दूर करण्यासाठी लावलेले होते. मराठवाड्यासह बीड जिल्ह्यातील बहुतांश सिंचन प्रकल्प यावर्षी कोरडे पडले आहेत. बीडमधील तर शंभरच्या जवळपास तळ्यातील गाळ हे तळे कोरडे पडल्याने काढला जात आहे. जिल्ह्याच्या लोकसंख्येपैकी जवळपास निम्म्या जणांना प्रशासनाला पाणी पुरवण्याचे आवाहन आहे. अशावेळी राज्य सरकार करत असलेल्या टंचाईच्या आणि पाणी पुरवठ्याच्या कामात हातभार लावण्यासाठी वेगवेगळे हात पुढे येत आहेत. मुंबई येथील हावरे इंजिनिअर्स आणि बिल्डर्स प्रायव्हेट लिमिटेडचे कार्यकारी संचालक सुरेश हावरे यांनी या मराठवाड्यातील दुष्काळी भागात तहानलेल्या नागरिकांना पाणी पुरवण्याचे ठरवले आहे. यासाठी रेल्वेद्वारे टंचाईग्रस्त गावात पाणी वाहून नेण्याची त्यांची तयारी आहे. टंचाईग्रस्त तालुक्यातील गावांसाठी रेल्वेद्वारे पाणी पुरवठा करण्यासाठी लागणारा सर्व खर्च उचलण्याचीही त्यांनी तयारी दर्शवली आहे.

विशेष म्हणजे मराठवाड्यातील बीड , लातूर , जालना या तीन जिल्ह्यातील जिथे पाण्याची गरज आहे तेथे रेल्वेने पाणी पुरवठा करण्याची तयारी दर्शविली असून त्याकरीता शासनाने त्यांना नाहरकत प्रमाणपत्र दिले आहे. या तिन्ही जिल्ह्यातील प्रशासनाला हावरे यांच्या संपर्कात रहावे व आवश्यकतेप्रमाणे वेळोवेळी कार्यवाही करण्याचे आदेश विभागीय आयुक्तांनी दिले आहेत. राज्य सरकारने हावरे बिल्डर्स यांना रेल्वेद्वारे पाणी पुरवठा करत असताना पाणी उपलब्धतेपासून ते पाणी वाटपापर्यंत वाहतूक तसेच पिण्यासाठी पाणी योग्य असल्याचे गुणवत्ता प्रमाणपत्र सक्षम प्राधिकाऱ्यांकडून घेण्यासहीत सर्व खर्च करण्याचे सांगितलेले आहे.

पाणीसंकट दूर होणार

मराठवाड्यातील दुष्काळात होरपळत असणाऱ्या आणि पाण्यासाठी दाहीदिशा ‌फिरणाऱ्या नागरिकांना मदतीसाठी अनेक हात पुढे येत आहेत. हावरे बिल्डर्स यांनी रेल्वेद्वारे पाणी पुरवठा खर्च करण्याची तयारी दर्शविल्याने या भागातील पाणीसंकट दूर होण्यात मदत होऊ शकेल.