RailEnquiry

मिरज - कोल्हापूर-हैदराबाद "टाईमपास एक्‍स्प्रेस' ठरली आहे. वेळ पाळण्यात अयशस्वी ठरली आहे. सरासरी दोन-चार तास विलंबाने धावते. हुबळीत गाडीला सवतीची वागणूक देण्यात येत आहे. प्रवास कंटाळवाणा ठरत आहे.

17 फेब्रुवारी 2010 पासून गाडी सुरू झाली. हरिप्रियाचे हैदराबाद कनेक्‍शन बंद झाले. गुंटकल जंक्‍शनवर हैदराबादचे डबे जोडणे आणि सुटे करणे यासाठी दोन तासांचा वेळ वाचला. सक्तीचा थांबा रद्द झाला. त्याचा फायदा झालाच नाही. तीन तास विलंबाने धावल्याने वेळेत फारसा फरक पडला नाही.

कोल्हापूर-हैदराबाद एक्‍स्प्रेस (11304) दररोज सकाळी साडेसात वाजता कोल्हापुरातून सुटते. हैदराबादमध्ये पहाटे साडेचार वाजता पोचावी, अशी अपेक्षा आहे. प्रत्यक्षात दोन-तीन तास उशिरा पोचते. हैदराबादहून (11303) रात्री साडेअकरा वाजता निघते. दुसऱ्या दिवशी सायंकाळी साडेसात वाजता कोल्हापुरात येणे अपेक्षित आहे. प्रत्यक्षात रात्री दहा, अकरा वाजेपर्यंत केव्हाही येते. एकवीस तासांचा प्रवास कधी चोवीस; तर कधी सव्वीस तास होतो.

हुबळीत हैदराबादला प्राधान्य दिले जात नसल्याने तिला विलंब होतो. सर्रास स्थानकांवर क्रॉसिंगसाठी थांबवले जाते. पॅसेंजर किंवा मालगाडी येणार असली तरीही "हैदराबाद'ला थांबवले जाते. घटप्रभा स्थानक म्हणजे हक्काचा थांबा ठरले. सायंकाळी सातच्या सुमारास ती स्थानकात येते. मागून यशवंतपूर-दादर, बंगळूर-कुर्ला या गाड्या येतात. त्यासाठी "हैदराबाद' थांबवून ठेवली जाते. मालगाडी येणार असली तरीही थांबा ठरलेलाच.

हरिप्रियाचे हैदराबाद कनेक्‍शन रद्द केल्याने वेळेत बचत होईल, ही अपेक्षा फोल ठरली. प्रवाशांच्या सहनशीलतेचा अंत पाहणाऱ्या या गाडीला एक्‍स्प्रेस का म्हणायचे, असा प्रश्‍न आहे. ही गाडी पंढरपूर-सोलापूरमार्गे सोडावी, अशी मागणी आहे.

400 किलोमीटर, 177 रुपये बचत
सध्या गाडी बेळगाव-गुंटकल-विकाराबादमार्गे 998 किलोमीटरसाठी एकवीस तासांचा वेळ घेते. जनरलला 176, स्लीपरला 299 आणि एसी थ्री टायरला 839 रुपये शुल्क आहे. मिरज-पंढरपूर-सोलापूर-गुलबर्गा-शहाबादवाडीमार्गे धावल्यास 603 किलोमीटर अंतर आहे. चारशे किलोमीटरचा प्रवास वाचणार आहे. नव्या प्रवासाला बारा तासांचा वेळ अपेक्षित आहे. स्लीपरला 122 आणि एसी थ्री टायरला 622 रुपये शुल्क असेल. स्लीपरसाठी 177 रुपयांची बचत होणार आहे.